كيف اتخلص من الكرش سريعا ؟

الموضوع اللي الناس بتسأل عنه دايما 

خطوات التخلص من البطن او ازاى  تخس ؟؟؟ او كيف  اخس بشكل عام ؟؟؟

طبعا البطن هي اول منطقة بتتخزن فيها الدهون ... علشان كده بيكون اخر مكان بيخس في الجسم و الاصعب طبعا

البطن فعلا اصعب منطقة تتحرق الدهون فيها ... بس على مين بقى ؟؟؟ احنا اللي بايدينا نخلي الصعب سهل

والموضوع بسيط ان شاء الله

1- نظام غذائي صحي :
----------------------------ه

* فطار صحي زي مثلا : بيض بالخضار في طاسه تيفال من غير زيت - 2 بيضة مسلوقة مع ربع رغيف - جبنه بربع رغيف او 2 توست اسمر - شوفان بلبن خالي دسم وعسل ابيض و موز - 5 معالق فول وخيار - قطعة جبنة قريش مع ربع رغيف وسلطة
* بعد ٣ ساعات ممكن ناكل ثمرة فاكهة او خضار
* غدا صحي مكون من بروتين + نشويات + خضار
بروتين : نصف فرخة مشوية او شريحتين لحم احمر او 2 سمكة مشوية او علبة تونة بدون زيت
نشويات : رز او مكرونة او عيش ( بكمية قليلة خالص )
الخضار : سلطة خضرا او خيار او خس
* كل ما نجوع بعد كدا ممكن ناكل خيار او خس باي كمية او ممكن ناكل ثمرة فاكهة واحدة او حبة مكسرات قليلة اوي و الكلام ده يكون قبل النوم ب 3 او 4 ساعات عالاقل
* قبل النوم بساعة ممكن ناكل زبادي لايت عليه نص لمونة

2- رياضة + تمارين بطن
----------------------------ه
محتاجين ساعة واحدة بس كل يوم رياضة ولو حتى في البيت او مشي حتى لو تمارين بسيطة وبالنسبة لتمارين البطن ممكن نلعبها يوم اه ويوم لا
وتكون التمارين بعد الاكل ب 3 ساعات عالاقل وممكن قبل التمارين بنص ساعة او ساعة ناكل موزة او نشرب فنجان قهوة من غير سكر

3- حاجات لازم ناخد بالنا منها اوي
-----------------------------------------ه
* نشرب عالاقل 3 لتر مياة خلال اليوم
* نشرب شاي اخضر او قرفة بدون سكر
* النوم من 6 ل 8 ساعات ويكون بدري علشان الحرق يزيد
* ممنوع اي نشويات بعد الساعة 8 مساءا
* ممنوع الدهون تماما وبدائلها : زيت الزيتون والمكسرات
* الفطار يبقى بدري على اد ما نقدر
* لينا 4 معالق سكر في اليوم وممكن نستبدلهم بعسل ابيض
* الدايت مش حرمان ... الدايت اسلوب حياة
* الدايت مش اكل قليل ... الدايت اكل صح

4- حاجات مهمة اوي اوي ( خاصة للي بيزهقوا بسرعة وحماسهم بيقل ومش بيكملوا ) :
-----------------------------------------------ه
* النظام اللي مكتوب فوق ده مش لازم نطبقه بالحرف ... ده مجرد مثال وممكن نقيس عليه اي اكل واي حاجة وممكن نخترع اكلات جديدة كمان
* مش شرط ناكل نفس الكمية المكتوبة دي ... المهم نقلل الكمية اللي متعودين عليها وواحدة واحدة هنقدر نوصل للكمية دي ... يعني مثلا اللي كان بيفطر برغيفين يخليه رغيف واحد و بعد فترة هيقلله و هكذا
* لو بوظت يوم مقولش خلاص بقى ماهي خربانة ... اليوم اللي بوظته تقدر تعوضه لو رجعت لطريقك تاني
* مش لازم تخس 10 كيلو في الشهر ... ممكن تخس 2 كيلو بس ... لكن المهم انك بتخس والاهم انك مش بتزيد زي زمان
* حط لنفسك هدف مبدأي و لما توصله حط هدف جديد وهكذا
* الاكل مجرد ما بيدخل بؤك بيروح طعمه ... يبقى ركز في الحاجة اللي هتفيد جسمك وتوصلك للشكل اللي انت عايزه
* اخر حاجة ... انت تقدر تعمل اي حاجة ... تقدر تعمل المستحيل ... بس لازم تتعب عشان تلاقي النتيجة

كل ما يكون في معلومة مفيدة هحطها في البوست عشان نستفيد